১৬ জানুৱাৰী ২০২৫-  কেনে আছে অভিনেতা ছৈয়ফ আলী খান? 

দুৰ্বৃত্তৰ আক্ৰমণৰ বলি হ'ল বলিউড অভিনেতা ছৈয়ফ আলী খান। আজি পুৱতি নিশা প্ৰায় ৩ মান বজাত নিজ বাসগৃহতেই বলিউড অভিনেতাজনক চুৰিৰে আক্ৰমণ কৰে দুৰ্বৃত্তই। ঘটনা অনুসৰি নিশা ছৈয়ফ আলী খানৰ মুম্বাইৰ বান্দ্ৰাস্থিত ঘৰত চোৰে প্ৰৱেশ কৰিছিল। চোৰক বাধা দিবলৈ চেষ্টা কৰোতেই এবাৰ-দুবাৰ নহয় ৬ বাৰকৈ দুৰ্বৃত্তই ছুৰীৰে আঘাত কৰে অভিনেতাজনক। বৰ্তমান অভিনেতাগৰাকী মুম্বাইৰ লীলাৱতী হাস্পতালত চিকিৎসাধীন হৈ আছে। ছৈয়ফ আলী খানৰ আঘাত বেছি গুৰুতৰ নহয় যদিও নিৰাপত্তাৰক্ষী থকাৰ পিছতো কেনেদৰে চোৰে প্ৰৱেশ কৰিব পালে এই ঘটনাই এতিয়া তীব্ৰ চাঞ্চল্যৰ সৃষ্টি কৰিছে।
ছৈয়ফ আলী খানৰ আক্ৰমণ সন্দৰ্ভত ন ন তথ্য প্ৰকাশ কৰিছে আৰক্ষীয়ে। চোৰক বাধা দিবলৈ চেষ্টা কৰোতেই চোৰে আক্ৰমণৰ লক্ষ্য কৰি লৈছিল অভিনেতাগৰাকীক। অভিনেতাজনক আঘাত কৰিয়েই পলায়ন কৰিছে চোৰে। শৰীৰৰ ৬টাকৈ স্থানত দুৰ্বৃত্তই আঘাত কৰা ছৈয়ফ আলী খানৰ দুটা আঘাত গুৰুতৰ বুলি জনাইছে চিকিৎসকে। 
ৰাজহাড়ৰ ওচৰত এটা গুৰুতৰ আঘাত পাইছে অভিনেতাজনে। প্ৰায় আঢ়ৈ ঘণ্টা ধৰি অস্ত্ৰোপচাৰ চলিছে ছৈয়ফ আলী খানৰ। আনহাতে দুৰ্বৃত্তৰ আক্ৰমণৰ বলি হোৱা সময়ত ঘৰত নাছিল পত্নী কৰীণা কাপুৰ। অভিনেতাজনৰ সৈতে হোৱা এই ভয়ংকৰ ঘটনা সন্দৰ্ভত বান্দ্ৰা আৰক্ষীয়ে গোচৰ ৰুজু কৰি চোৰৰ সন্ধানত আৰম্ভ কৰিছে অভিযান।