১৬ অক্টোবৰ,২০২৪ - পাংগং হ্ৰদৰ উত্তৰে চীনৰ বসতি স্থাপনৰ পিছতেই সীমান্তত বৃদ্ধি উত্তেজনা।
ভাৰত আৰু চীনৰ মাজৰ সীমান্তৰ সম্পৰ্ক নিয়ন্ত্ৰণ ৰখাৰ বাবে চলি থকা কূটনৈতিক প্ৰচেষ্টাৰ মাজত উদ্বেগ বৃদ্ধি পাইছে। শেহতীয়া ছেটেলাইটৰ ছবিয়ে পাংগং হ্ৰদৰ ওচৰত চীনৰ বসতি স্থাপনৰ ছবি প্ৰকাশ কৰিছে, যিয়ে দুয়োখন দেশৰ সীমান্তত উত্তেজনা বৃদ্ধি কৰিছে। আমেৰিকা যুক্তৰাষ্ট্ৰৰ মেক্সাৰ টেকন'লজিয়ে ৯ অক্টোবৰত তোলা ফটোবোৰত ২০২০ চনৰ সংঘৰ্ষৰ এক গুৰুত্বপূৰ্ণ অচলাৱস্থাৰ পৰা প্ৰায় ৩৮ কিলোমিটাৰ পূবত চীনৰ এটা বৃহৎ বসতিৰ কথা প্ৰকাশ কৰিছে। যদিও চীনে বসতি স্থাপন কৰা এলেকাতো ভাৰতে দাবী কৰা অঞ্চলৰ বাহিৰত কিন্তু প্ৰকৃত নিয়ন্ত্ৰণ ৰেখাৰ ওচৰত থকাটোৱে কৌশলগতভাৱে অঞ্চলটোত চীনৰ বৰ্ধিত উপস্থিতিৰ বিষয়ে আশংকা বৃদ্ধি কৰিছে। উল্লেখ্য যে পৃথিৱীৰ সৰ্বোচ্চ খাৰুৱা পানীৰ হ্ৰদ হিচাপে পৰিচিত পাংগং হ্ৰদ দীৰ্ঘদিন ধৰি দুয়োখন দেশৰ মাজত স্থায়ী সীমান্ত বিবাদৰ কেন্দ্ৰ বিন্দু হৈ আহিছে।
ছেটেলাইটৰ ছবি অনুসৰি 17 হেক্টৰৰ অধিক ভূমি দ্ৰুতগতিত পৰিৱৰ্তন কৰা হৈছে, আৱাসিক আৰু প্ৰশাসনিক গাঁথনিকে ধৰি 100 টাতকৈও অধিক অট্টালিকা তাত নিৰ্মাণাধীন হৈ আছে। অঞ্চলটোৰ দক্ষিণ-পূব কোণত এটা ১৫০ মিটাৰ দীঘল আয়তাকাৰ পটিত হেলিকপ্টাৰ উঠা-নমাৰ বাবে হেলিপেড নিৰ্মাণ কৰা হ'ব পাৰে বুলিও মন্তব্য কৰিছে তক্ষশীলা ইনষ্টিটিউটৰ মুৰব্বী ৱাই নিত্যানন্দমে।
চীনৰ এই নিৰ্মাণ কাৰ্য এনে এটা সময়ত পোহৰলৈ আহিছে যি সময়ত দুয়োখন দেশে বছৰ বছৰ ধৰি সীমান্তত বাঢ়ি অহা উত্তেজনা নিয়ন্ত্ৰণ কৰি এক সুসম্পৰ্ক গঢ়িবলৈ চেষ্টা কৰি আছে। চীনৰ এই নিৰ্মাণ কাৰ্যকলাপে দুয়োখন ৰাষ্ট্ৰৰ মাজত থকা কূটনৈতিক সম্পৰ্ক দুৰ্বলতাও প্ৰকাশ কৰিছে।