২৮ মাৰ্চ, ২০২৩ঃ গামোচাৰ বিকৃতকৰণৰ বাবে দুখ প্ৰকাশ কৰিছে বাংলা সাহিত্য সভাই। গামোচা আৰু ‘গামচা’ একেলগ কৰি বিকৃত কৰিছিল সভাই। অসমীয়াৰ স্বাভিমানক দুটুকুৰা কৰি জোৰা লগাইছিল আন বস্ত্ৰৰে। দুখ প্ৰকাশ কৰি সভাৰ কাৰ্যকৰী সভাপতি আৰু সাধাৰণ সম্পাদকে দিলে বিবৃতি।
সেই সম্বৰ্ধনা বস্ত্ৰ বাংলা সাহিত্য সভাই সৃষ্টি কৰা অংগ বস্ত্ৰ নাছিল। সামাজিক মাধ্যমৰ এখন ছবিৰ পৰা এই আৰ্হি গ্ৰহণ কৰা হৈছিল বুলি কয় বাংলা সাহিত্য সভাই। উল্লেখ্য যে ডেৰ বছৰ আগতেই শিলচৰত কোনো সংগঠনে সাংস্কৃতিক মন্ত্ৰীক এই অংগ বস্ত্ৰ দিছিল। ভাষিক উন্নয়ন পৰিষদৰ অধ্যক্ষ শিলাদিত্য দেৱৰ সন্মতি লৈ কৰা হৈছিল।
আমি বেয়া উদ্দেশ্য আগত ৰাখি এই কাম কৰা নাছিলো বুলি মত প্ৰকাশ বাংলা সাহিত্য সভাৰ। অজানিতে দিয়া আঘাতৰ বাবে আন্তৰিকভাৱে দুখ প্ৰকাশ কৰিছে বাংলা সাহিত্য সভাই। মুক্ত মনেৰে আমি বৰাক-ব্ৰহ্মপুত্ৰৰ সমন্বয়ৰ আপ্ৰাণ চেষ্টা কৰিছিলো। এই বিতৰ্ক ইমানতে শেষ কৰিবলৈ আহ্বান জনালে বাংলা সাহিত্য সভাই।