১৩ ফেব্ৰুৱাৰী ২০২৫- স্নাতক উত্তীৰ্ণয়ো পোৱা নাই চাকৰি! প্ৰতিবেদনত প্ৰকাশ চাঞ্চল্যকৰ তথ্য
ভাৰতৰ শিক্ষা আৰু কৰ্মসংস্থাপনৰ সুযোগ সম্পৰ্কে নীতি আয়োগৰ শেহতীয়া প্ৰতিবেদনে এক চাঞ্চল্যৰ সৃষ্টি কৰিছে। প্ৰতিবেদন অনুসৰি ভাৰতৰ বহু ৰাজ্যৰ যুৱক-যুৱতীসকলৰ মাজত ইংৰাজী ভাষাৰ দুৰ্বল দখলে তেওঁলোকৰ নিয়োগযোগ্যতাক প্ৰভাৱিত কৰিছে। প্ৰতিবেদন অনুসৰি দেশত এনে বহুলোক আছে যিয়ে তেওঁলোকৰ দুৰ্বল ইংৰাজীৰ বাবে চাকৰি লাভ কৰা নাই। নীতি আয়োগৰ তথ্য অনুসৰি, ৰাজ্যৰ চৰকাৰী বিশ্ববিদ্যালয়ৰ পৰা স্নাতক লাভ কৰা যুৱক-যুৱতীসকলৰ মাজত নিবনুৱাৰ সংখ্য়া বৃদ্ধি পোৱাৰ মুখ্য কাৰণ হ’ল ‘অপৰ্যাপ্ত’ ইংৰাজী ভাষাৰ দক্ষতা। ইয়াৰ মাজতে নীতি আয়োগে এক প্ৰতিবেদন দাখিল কৰিছে য’ত উল্লেখ কৰিছে যে স্নাতক উত্তীৰ্ণ একাংশৰ ইংৰাজী দুৰ্বল হোৱাৰ বাবে চাকৰি লাভ নকৰে। বিশেষকৈ ৰাজ্যিক ৰাজহুৱা বিশ্ববিদ্যালয় (SPU)ৰ পৰা স্নাতক হোৱা ছাত্ৰ-ছাত্ৰীসকলে এই সমস্যাৰ অধিক সন্মুখীন হয়। প্ৰতিবেদনত কোৱা হৈছে যে বহু ৰাজ্যত স্থানীয় উদ্যোগত কৰ্মৰত দক্ষ লোক বাহিৰৰ ৰাজ্যৰ পৰা আহে, কিয়নো ইংৰাজী ভাষাত দক্ষতাহীনতাৰ বাবে স্থানীয় যুৱক-যুৱতীসকল সুযোগৰ পৰা বঞ্চিত হয়। এই ধাৰাটোৰ বাবেই ৰাজ্যসমূহৰ পৰা প্ৰতিভাৰ প্ৰব্ৰজনো দেখা গৈছে।
এই প্ৰত্যাহ্বানৰ মোকাবিলা কৰিবলৈ নীতি আয়োগে ৰাজ্য চৰকাৰসমূহক আন্তঃৰাষ্ট্ৰীয় ভাষা সংস্থাসমূহৰ সহযোগত ইংৰাজী আৰু অন্যান্য বিদেশী ভাষাৰ বাবে প্ৰশিক্ষণ কাৰ্যসূচী আৰম্ভ কৰিবলৈ পৰামৰ্শ আগবঢ়াইছে। প্ৰতিবেদনত পঞ্জাৱ আৰু কৰ্ণাটকৰ উদাহৰণ দিয়া হৈছে, য’ত এই দিশত ফলপ্ৰসূ পদক্ষেপ গ্ৰহণ কৰা হৈছে। মন কৰিবলগীয়া যে ২০২৩ চনত পঞ্জাৱ চৰকাৰে ব্ৰিটিছ কাউন্সিলৰ সহযোগত ইংৰাজী ভাষাৰ দক্ষতা বৃদ্ধিৰ বাবে এক পদক্ষেপ গ্ৰহণ কৰিছিল। একে সময়তে কৰ্ণাটক চৰকাৰে উচ্চ শিক্ষাৰ প্ৰসাৰ, ভাষা দক্ষতা বৃদ্ধি আৰু কৰ্মসংস্থাপনৰ সুযোগ বৃদ্ধিৰ বাবে ২০২৪ চনত চাৰিটা বিশেষ কাৰ্যসূচী আৰম্ভ কৰে। প্ৰতিবেদন অনুসৰি এই প্ৰচেষ্টাসমূহে ছাত্ৰ-ছাত্ৰীৰ নিয়োগযোগ্যতাৰ ক্ষেত্ৰত যথেষ্ট উন্নতি সাধন কৰিছে।
লগতে নীতি আয়োগে দিয়া পৰামৰ্শ অনুসৰি ছাত্ৰ-ছাত্ৰীসকলে ইংৰাজীৰ লগতে ডিজিটেল আৰু কাৰিকৰী দক্ষতাও গঢ়ি তুলিব লাগিব যাতে তেওঁলোকে চাকৰিৰ বজাৰত প্ৰতিযোগিতাত অৱতীৰ্ণ হ’ব পাৰে। শিক্ষা ব্যৱস্থা আৰু ডিজিটেল আন্তঃগাঁথনিৰ ক্ষেত্ৰতো বৃহৎ উন্নতিৰ প্ৰয়োজন বুলি প্ৰতিবেদনত প্ৰকাশ পাইছে।