২৬ জানুৱাৰী ২০২৫-  মহাকুম্ভত গংগা স্নান কৰি RCB দলৰ অনুৰাগীয়ে কলে-‘ই চালা কাপ নামদে’

উত্তৰ প্ৰদেশৰ প্ৰয়াগৰাজত চলি থকা মহাকুম্ভ মেলাত লাখ লাখ তীৰ্থযাত্ৰী, সাধু-সন্ন্যাসীয়ে অংশগ্ৰহণ কৰিছে। প্ৰতিদিনে চৰ্চাৰ কেন্দ্ৰবিন্দু হোৱা এই মহাকুম্ভ মেলাত এইবাৰ  চৰ্চালৈ আহিছে এগৰাকী ক্ৰিকেট অনুৰাগী। ছচিয়েল মিডিয়াত ক্ৰমাৎ ভাইৰেল হৈ পৰা অনুৰাগীগৰাকী হৈছে IPLৰ RCB দলৰ ফেন। 
  ২০০৮ চনতেই IPLৰ আৰম্ভণি হৈছিল যদিও বৰ্তমান পৰ্যন্ত RCB দলে ট্ৰফী জয় কৰিবলৈ সক্ষম হোৱা নাই। এটা সময়ত  RCB দলটোত আছিল  এ বি ডি ভিলিয়াৰ্ছ, ক্ৰীছ গেইল, গ্লেন মেক্সৱেল,ৰাহুল দ্ৰাবিড়, অনিল কুম্বলে, ডেল ষ্টেইনৰ দৰে তাৰকা। আনহাতে বৰ্তমানপৰ্যন্ত RCB দলৰ হৈ খেলি আছে বিশ্বৰ সৰ্বশ্ৰেষ্ঠ বেটছমেন বিৰাট কোহলী। কিন্তু তাৰ পিছতো ট্ৰফী জয়ৰ সোৱাদ পোৱা নাই দলটোৱে। অৱশ্যে ট্ৰফী জয় কৰিব নোৱাৰিলেও কিন্তু IPL ইতিহাসৰ আটাইতকৈ সফল দল মুম্বাই ইণ্ডিয়ানছ  আৰু চেন্নাই চুপাৰ কিংছ দলৰ সমানেই সমগ্ৰ বিশ্বতে আছে RCB দলৰ অনুৰাগী। অনুৰাগীয়ে কেতিয়াও নিৰাশ কৰা নাই দলটোক। 
  ঠিক তেনে এজন অনুৰাগীয়ে মহাকুম্ভ মেলালৈ আহি RCB দলৰ বাবে কৰিলে গংগা স্নান। RCB দল জাৰ্ছি পিন্ধি ত্ৰিবেণী সংগমত ডুব মাৰি অনুৰাগীগৰাকীয়ে RCB দলৰ ট্ৰফী জয়ৰ বাবে কৰিছে প্ৰাৰ্থনা। কেৱল প্ৰাৰ্থনা কৰাই নহয় অনুৰাগীগৰাকীয়ে  ডুব মাৰি মাৰি কৈছে ‘ই চালা কাপ নামদে’বুলিও। 
  উল্লেখ্য যে অনুৰাগীগৰাকীৰ এই ভিডিঅ এতিয়া সামাজিক মাধ্যমত ভাইৰেল হৈ পৰিছে।  একাংশই অনুৰাগীগৰাকীৰ এই কাণ্ডক সমালোচনা কৰাৰ লগতে আন একাংশই আকৌ প্ৰশংসা কৰিছে।