২৬ জানুৱাৰী ২০২৫- ভাৰতৰ আটাইতকৈ চহকী মন্দিৰটো

সমগ্ৰ ভাৰতবৰ্ষতেই আছে অগণন মন্দিৰ। সকলো মন্দিৰৰে আজি সুকীয়া মহত্ব। ইয়াৰ ভিতৰত কিছুমান মন্দিৰ কেৱল ধৰ্মীয় তাৎপৰ্য্যৰ বাবেই নহয়, অভিলেখসংখ্যক ধনৰ বাবেও পৰিচিত। আপুনি জানেনে ভাৰতৰ আটাইতকৈ চহকী মন্দিৰ কোনটো?

 ভাৰতৰ আটাইতকৈ চহকী মন্দিৰটো হৈছে তিৰুমালা তিৰুপতি ভেংকটেশ্বৰ মন্দিৰ। অন্ধ্ৰ প্ৰদেশৰ তিৰুপতিত অৱস্থিত তিৰুমালা তিৰুপতি ভেংকটেশ্বৰ মন্দিৰ ভাৰতৰ আটাইতকৈ চহকী মন্দিৰ। এই মন্দিৰটো ভগৱান বিষ্ণুৰ এক ৰূপ ভেংকটেশ্বৰৰ নামত উৎসৰ্গিত। কলিযুগৰ বিপদৰ পৰা মানৱ জাতিক বচাবলৈ ইয়াত ভগৱান বিষ্ণুৰ আবিৰ্ভাৱ হৈছিল বুলি বিশ্বাস কৰা হয়। সেয়েহে এই স্থানক কলিযুগ বৈকুণ্ঠ বুলিও কোৱা হয়। এই মন্দিৰটো তিৰুমালা মন্দিৰ, তিৰুপতি মন্দিৰ, তিৰুপতি বালাজী মন্দিৰ আদি আন নামেৰেও জনা যায়।  এই মন্দিৰটো অন্ধ্ৰ প্ৰদেশ চৰকাৰৰ নিয়ন্ত্ৰণত থকা তিৰুমালা তিৰুপতি দেৱস্থানম (TTD) ৰ দ্বাৰা পৰিচালিত ৷ টিটিডিৰ মুৰব্বীক অন্ধ্ৰ প্ৰদেশ চৰকাৰে নিযুক্তি দিয়ে। সংগম সাহিত্যত তিৰুপতীক ত্ৰিবেংগদম বুলি উল্লেখ কৰা হৈছে, যিটো তামিল ভাষাৰ অন্যতম আদিম সাহিত্য। তিৰুপতিৰ ইতিহাস সন্দৰ্ভত ইতিহাসবিদৰ মাজত মতানৈক্য দেখা যায়। কিন্তু এইটো স্পষ্ট যে ৫ম শতিকাৰ ভিতৰত ই নিজকে এক প্ৰধান ধৰ্মীয় কেন্দ্ৰ হিচাপে প্ৰতিষ্ঠা কৰিছিল। কোৱা হয় যে এই মন্দিৰ নিৰ্মাণত চোলা, হয়ছাল আৰু বিজয়নগৰৰ ৰজাই আৰ্থিকভাৱে বিশেষ অৱদান আগবঢ়াইছিল।

তিৰুপতি ভেংকটেশ্বৰ মন্দিৰ বাৰ্ষিক আয়ৰ ক্ষেত্ৰত আগৰণুৱা। এই মন্দিৰৰ বাৰ্ষিক আয় ১৬০০ কোটি। দানৰ বাহিৰেও ইয়াত আন উপাৰ্জনৰ উৎস আছে। ভগৱান বিষ্ণুৰ প্ৰতি উৎসৰ্গিত এই মন্দিৰটো অলৌকিকতা আৰু ৰহস্যৰ বাবে বিখ্যাত। প্ৰতি বছৰে ইয়ালৈ প্ৰায় ৬৫০ কোটি টকাৰ অনুদান আহে। মন্দিৰ ট্ৰাষ্টত ৯ টন সোণৰ মজুত আৰু ১৪ হাজাৰ কোটি টকাৰ ফিক্সড ডিপ’জিট আছে।